ލަންކާގެ ރައީސް ގޯޓާބަޔަ ރާޖަޕަކްސާއަށް އިތުރު ބާރުތަކެއް ދޭން އެގައުމުގެ ޕާލިމަންޓުން ފާސްކޮށްފި އެވެ.

މި ބާރުތައް ދިނުމަށް ލަންކާގެ މަޖިލީހުން ބުރާސްފަތި ދުވަހު ފާސް ކޮށްފައި ވަނީ ދެ ދުވަހުގެ ބަހުސަކަށް ފަހުއެވެ. މި ބަހުސްގައި ލަންކާގެ އިދިކޮޅު ފަރާތްތަކުން ވަނީ އެ ގައުމުގެ ރައީސް ގޯޓަބަޔަ ރާޖަޕަކްސައަކީ ޑިކްޓޭޓަރެއް ކަމަށް ބުނެ ފާޑުކިޔާފައެވެ.

އޭގެ އިތުރުން ގެނެވުނު އިސްލާހުތަކާއި އެކު ބޮޑުވަޒީރު ވެސް ހިމެނޭ ގޮތަށް ވަޒީރުން މަގާމުން ވަކި ކުރުމާއި ވެރިކަމަށް 2.5 އަހަރު ފަހުން ގާނޫނު ހަދާ މަޖިލީސް އުވާލުމުގެ ބާރު ގޯޓާބަޔައަށް ވަނީ ލިބިވަޑައިގެންފައެވެ. އަދި މަތީ ކޯޓުތަކަށް ފަނޑިޔާރުން އައްޔަނު ކުރުމުގެ ބާރުވެސް ލިބިގެން ދާނެއެވެ.

އާ އިސްލާހާ އެކު އެހެން ގައުމުތަކުގެ ރައްޔިތުކަން އޮންނަ މީހުންނަށް ވެސް ޕާލިމަންޓްގައި ތިބެވޭނެ އެވެ. އެއާ އެކު ރާޖަޕަކްސާ އާއިލާގައި ހިމެނޭ ބަސިލް ރާޖަޕަކްސާއަށް ވެސް ޕާލިމަންޓަށް ކުރިމަތިލެވޭނެ އެވެ.

އެމެރިކާގެ ރައްޔިތުކަން އޮންނަ ބަސިލް މީގެ ކުރިން ވެސް ވަނީ ޕާލިމަންޓްގެ މެމްބަރުކަން ކުރައްވައިފަ އެވެ.