ދައުލަތުގެ ދަރަނި 172 ބިލިއަން ރުފިޔާއަށް ވުރެ މަތިވެފައިވާ ކަމަށް ރައްޔިތުންގެ މަޖިލީހުން އެކުލަވާލި ދައުލަތުގެ ދަރަންޏާ ބެހޭ ރިޕޯޓުން ދައްކައިފި އެވެ.

ދައުލަތުގެ ދަރަނި 172 ބިލިއަން ރުފިޔާއަށް އަރާފައި ވާއިރު، ދަރަނި އަނބުރާ ދެއްކުމަށް މި އަހަރުގެ ފަހު ކުއާޓާގައި 10 ބިލިއަން ރުފިޔާ ހޭދަ ކުރުމަށް ނިންމާފައި ވެއެވެ.

ފިނޭންސް މިނިސްޓްރީން ހޯދި މައުލޫމާތުގެ މައްޗަށް އެކުލަވާލި ރިޕޯޓު މުޅި މަޖިލީހުގެ ކޮމިޓީއަށް މިއަދު ހުށަހަޅާ، ބަހުސްކޮށްފައި ވެއެވެ.

ކޮމިޓީގެ މުގައްރިރު އަދި މަޖިލީހުގެ ރައީސް، ކުރީގެ ރައީސް މުހައްމަދު ނަޝީދު ވިދާޅުވީ ޖުމްލަ ގޮތެއްގައި ދަރަނި ނަގާފައި ހުރީ ގާނޫނާ އެއް ގޮތަށް ކަމަށެވެ.

އޭގެ އިތުރުން ދަރަނީގެ ސަބަބުން ދައުލަތަށް ބުރަ ބޮޑުވެފައި ވަނީ ދަރަނި ނުދެއްކުމުން ކަމަށާއި މިހާރު އެންމެ ބޮޑު ކަންބޮޑުވުމަކީ އަންނަ އަހަރު ދައްކަން ޖެހޭ އަދަދު ބޮޑުވުން ކަމަށް ވިދާޅުވި އެވެ.